acomplie grant partie de leur volenté, se il n’eussent esté aperceu. Car en ce point que li nostre estoient ensi au desus dou flum d’Iberus, entor iii jornées, Abaidons[1], li dux de Tortouse, gardoit les rivages dou flum que li nostre ne passassent outre. Si avint ensi que uns Mors entra ou flum pour soi bagnier, et vit une fiente de cheval qui ovec l’iaue descendoit ; il la prist et la mist à son nés et senti bien que ce estoit. Lors commença hautement à crier : « Esgardez, esgardez, segneur compagnon, mestier vous est que vous vous gardez, car ceste fiente n’est pas d’asne, ne de nule beste qui ait acoustumé à paistre en herbages, ainz est de mul ou de cheval, si com il apert par l’oudor de la fiente ; et pour ce, vous lo-je que vous vous gardez sagement, car si comme il me semble, nostre anemi nous espient au desus de ce flum. » Tout maintenant envoierent ii de leur compagnons à cheval pour savoir se c’estoit voirs ou non ; et cil qui bien aperçurent les noz retornerent maintenant et renuncierent à leur duc Abaide ce que il avoient trové. Lors orent si grant paor que il s’enfuirent maintenant tuit et lessierent leur herberges et quanque il avoit dedenz, et li nostre qui passé furent descendirent selonc le flum jusques à leur pavellons ; quanque il troverent enz, ravirent et herbergierent cele nuit dedenz. L’endemain vint contre iaus à bataille Abaydons li dus de Tortouse, a granz compagnies de Mors et de Sarrazins que il ot assemblez de toutes parz. Et tout fussent li nostre trop mains que cil n’estoient, si se combatirent-il si forment que il les firent torner en fuie, et
- ↑ Latin : « Abaidus dux Tortosæ. »
