[1]Quant ce vint au noviau tens[2], li peres li manda que il s’apareillast pour movoir ovec lui en Ytalie ; mais assez tost après ot autre conseil et li remanda que il ne se meust. En Ythalie mut li rois Kalles sanz lui, et avant que il retornast de cele voie le firent li Romain empereor de la cité de Rome, si comme l’estoire devisa en ses faiz. Mais endementres que ce avint, ala ses fiuz en la cité de Thoulouse, son ost apareilla et mut en Espagne ; et quant il aprocha de la cité de Barcinone, Zadons, li dux de la vile, qui ja estoit à li sougiez, li vint au devant, mes il ne li livra pas la cité. Li rois passa outre jusques à une autre cité qui a non Hilerde[3], par force la prist et puis la craventa. Chastiaus et autres fortereces prist et gasta et ardi, puis passa tout outre jusques à une cité qui a non Osque[4]. Les chans qui estoient plain de blez sierent et gasterent. Tout quanque il troverent dehors les murs de la cité mistrent à feu et à destruction, et quant l’yvers approcha li rois et ses oz retorna en son païs.
[5]Quant li prinstens renovela, Kallemaine li empereres s’apareilla pour ostoier en Saisoigne. A son fil manda que il le suist et que il s’apareillast ausi comme pour demourer tout l’yver en la terre. Li fiuz fist le
- ↑ Vita Hludowici imperatoris, chap. x.
- ↑ 800.
- ↑ Hilerde, Lerida.
- ↑ Osque, Huesca.
- ↑ Vita Hludowici imperatoris, chap. xi. D’après D. Bouquet, Rec. des Hist. des Gaules et de la France, t. VI, p. 91, note a, et d’après Pertz, Mon. Germ. hist., Scriptores, t. II, p. 611, il y aurait ici une confusion. Les événements rapportés au chapitre xi de la Vita Hludowici concerneraient l’année 804.
