Li xviii parole comment touz li poples se torna devers ses fiuz et de la deception l’apostoile ; comment si fil le pristrent, lui et sa fame et Challot son petit fil, et comment il departirent le roiaume ; de la complainte que il fait de ses fiuz, et puis comment il gaba le serjant qui le gardoit à Saint Mahart de Soissons.
Li xix parole de la repentance des barons qui contre lui furent ; de fause cautele des traiteurs ; coment Lothaire l’enmena à Es la Chapelle ; comment li baron s’alierent pour lui delivrer, et comment il le laissa à Saint Denys et s’enfui à Vienne, et de maintes autres choses.
Li xx parole comment li empereres fu restabliz en l’empire ; comment Lothaires ardi et prist la cité de Chalon, et comment li empereres i vint au secors, mais ce fu trop tart ; coment il le chaça jusques à Blois, et comment il vint à lui à merci, et comment li empereres acusa ses traiteurs par devant les barons.
Li xxi parole de la requeste Judith, l’empereriz ; coment Lothaires ne pot venir à son pere pour sa maladie ; des chastoiemenz que il li mande pour les gries que il fesoit à sainte Eglise ; des messages l’apostoile que Lothaire retint ; de la mort des barons Lothaire, et comment li empereres manda ses fiuz au parlement, et d’autres choses.
Li xxii parole de la comete qui aparut ; comment il donna à Challe son petit fil partie de l’empire, dont li frere furent moult corroucié, et comment il le corona ; de la complainte dou pople contre le conte Berart ; comment il donna grant terre à Lothaire pour ce que il fut garde de son fil Challot ; comment Looys ostoia contre son pere.
