n’en avoit plus fait, et dist que se il fust avant alez, il eust eu tout le roiaume de France. Si refurent à grant mesaise Gozelins et Conraz de ce que li rois les avoit ensi reusez de soi, et eus et leur compagnons. A la roine s’en alerent et se conplainstrent à lui de ce que il estoient ensi deceu, et la roine envoia message à lor compagnons ausi come de par le roi pour eus conforter, et uns autres messages, ausi come pour ostages. Atant retornerent li abbés Gozelins et Conraz à leur compagnons. Tout ravissoient et toloient quanque il pooient trover devant eus, et leur distrent que il ne demoroit pas que li rois ne venist en France a grant ost ; mais il ne pooit pas venir maintenant, car noveles li estoient venues que Kallemaines[1] ses freres estoit chauz en paralisie et estoit ausi come à la mort, et voirs estoit que il estoit ja morz et que uns siens fiuz de bast, qui Arnous avoit non, s’estoit ja mis en saisine de cele partie du roiaume, et pour ce, estoit là li rois alez hastivement. Et sanz faille, tout ce estoit voirs, et quant il ot la chose apaisié il retorna à sa fame.
Ci faut l’estoire de Loois le fil Kalle le Chauf.
- ↑ Carloman, fils de Louis le Germanique, roi de Bavière, mourut le 22 mars 880 et laissa, de sa concubine Litwinde, un fils nommé Arnoul qui parvint ensuite à l’Empire.
