l’apela et li dist moult doucement : « Kalle, mes successors, qui maintenant es le tierz après moi en l’empire des Romains, vien près de moi. Je sai bien que tu es venuz par les tormenz où tes peres et mes freres est tormentez en bains boulanz, mès il sera tout delivrés par la misericorde Nostre Seigneur de ces paines, ausi come nous sommes par les merites saint Pere et par les prieres saint Denys[1] et saint Remi, à cui Nostre Sires a doné grant pooir d’apostre sor touz les rois et sor toute la gent de France ; et se il ne soustenoient et gardoient nostre lignie, ele faudroit assez tost ; et saches que li empires sera assez tost osté de tes mains et que tu vivras desoremais assez poi de jors. » Lors, se retorna contre lui Looys et li dist : « Li empires des Romains que tu as tenu jusques ici doit par droit recevoir après toi Loys le fiuz de ma fille. » Et quant il ot ce dit, il li sembla que il veist devant lui cel enfant Loys ; et Lothaires ses aïeus le prist lors et dist ensi : « Tiex est cit enfes come estoit cil que Nostres Sires establi ou milieu de ses deciples quant il leur dist : à tiex est li regnes des cieus. — Adonc, li dist Lothaires, rent li maintenant le pooir de l’empire par ce fil que tu tiens en ta main ». Lors, desloia Kalles le fil de son pouce, et par le fil li rendoit la monarchie de tout l’empire ; et tout maintenant, li luissiaus de fil resplendissant, ausi come uns rais de soleil, s’amoncela touz en la main de l’enfant. Après ce fait, repaira li esperiz Kalles au cors, moult las et moult travailliez.
- ↑ Saint Denis ne figure pas dans le texte latin.
