au mandement, mais que li privilege de leur eveschiez, qui estoient doné selonc les canons, leur fussent gardé. Moult s’efforça derechief li empereres et li messages à ce que il respondissent simplement et absoluement à ce que li Apostoile mandoit de la primacie Ensegise ; mès ainques autre response que la premiere ne porent avoir, fors que tant que Frotaires, li arcevesques de Bordiaus, respondi par flaterie ce que il cuidoit qui deust plaire à l’empereor, pour ce que il estoit venuz de Bordiaus à Poitiers, et de Poitiers à Boorges, contre les droiz des canons, par le deport et par l’asentement du prince. Lors s’esmut li empereres et dist que li Apostoles avoit doné son pooir à Ensegise ou concile et que il tendroit son commandement. Lors prist l’epistre toute enroulée, il et li messages, et la baillierent à Ensegise, et li fist aporter une chaiere et la fist metre par desus touz les evesques du roiaume deça les monz, delez Jehan de Toscane message l’Apostole qui seoit delez lui, et commanda à Ensegise que il passast tout outre par desus touz les autres qui avant devoient seoir par ordre, et seist en la chaiere. Lors commença à crier devant touz, li arcevesques de Rains, que ce estoit contre les reules et les droiz de sains canons ; mès toutevoies demora li empereres en son propos. Après ce, requistrent li prelat derechief que il eussent l’exemplaire de l’epistre qui à eus estoit envoiée, ne ainques avoir ne la porent ; et en tele maniere se departi li conciles, sanz plus faire à cele jornée.
En la X kalende de ce mois[1] meismes, assemblerent derechief li prelat. En ce concile furent leues les
- ↑ 22 juin 876.
