et de son conseil, que il venissent à lui. De là, s’en ala à Lengres et atendi ceus que il beoit à mener ovec lui en Ythalie. La roine Richeut envoia à Senliz[1] par la cité de Rains, son fil Loys envoia en cele partie du roiaume que il avoit receue contre Loys son frere, après la mort Lothaire son neveu. Aus kalendes de septembre mut et s’en ala par Saint Morise de Chablies, après passa les monz de Monjeu[2] et entra es plains de Lombardie.
Bien sot Loys, li rois de Germanie, les noveles de la mort Loys, l’empereor d’Ythalie, son neveu et que ses freres Kalles, li rois de France, estoit ja là meuz pour ceste chose. Tantost, envoia Kalle son fil contre lui et li rois Kalles ala ausi encontre quant il sot que il venoit. Mès cil, qui pas ne l’osa atendre, s’enfui. De ce fu li peres moult corrociez, ne pour ce ne vot pas la besoigne entrelessier, ainz i envoia Kalemanne son autre fil a granz genz. Li rois Kalles, qui plus granz force avoit, vint encontre lui à bataille ; mès Kallemanne
