CHARLES LE CHAUVE
Ci après commencemnt celes de Challe le Chauf, son fil.
Ci commencent li chapitre des gestes l’empereor Challe le Chauf ; si parole li premiers, comment si frere se combatirent contre lui et comment il furent desconfit et s’enfuirent ; et puis comment il pacifierent et partirent l’empire, et comment Lothaires fu moines et trespassa en religion, et comment i de ses freres fu deceuz, et de maintes autres choses.
Li seconz parole comment li rois Kalles li Chaus reçut messages que il n’entrast ou roiaume qui out esté Lothaire son frere, jusques après que il fust partiz, et comment li prelat le reçurent à segneur en la cité de Mez, et des constitutions qui là furent establies.
Li iii parole du mandement Loys à Kalle, son frere, et de la response et puis d’une incidence des Griex et du domage que Sarrazins firent au roi Loys au retor de Bonivent, et puis de Rolland l’arcevesque d’Alle, et puis des Normanz et de la mort la roine Hermentrut, et puis du mandement l’Apostole à Challe le Chauf.
Li iiii parole comment Kalle li Chaus aspousa la roine Richeut et de la pais aus Normanz ; du debat entre Kalle le Chauf et Loys son frere pour la partison du roiaume Lothaire ; du concile des evesques et puis comment li roiaumes fu partiz entre Challe le Chauf et Loys son frere.
