trie qui estoient present li firent feueté et homage, et cil qui pas n’estoient là li firent puis autel, quant il fu retornez en son roiaume.
En ce tens vindrent à cort presque tuit li plus noble home de Sepmanie. Tuit se plaignoient de Berart le duc de ces parties, et disoient que il toloit aus homes et aus eglises leur biens sanz raison, tout à sa volenté. Pour ce requeroient à l’empereor que il les receut en sa garde, et après i envoiast tiex qui fussent si fort et si sage que il restablissent les choses tolues au pople et aus eglises, et feissent tenir et garder les ancienes lois du païs[1]. Volentiers s’acorda li empereres à ceste requeste. Pour ceste besogne, furent esleu li cuens Doneez[2] et li cuens Bonifaces et li abbés de Flavegni[3]. Atant se parti de là li empereres et s’en ala chacier en bois vers le septembre si comme il avoit acoustumé. Vers l’yver se retraist à Es la Chapele.
Quant li forz yver fu trespassez, droit es kalendes de jenvier, l’estoile comete aparut ou signe de l’escorpion, et en poi de tens après morut Pepins[4], li uns des fiuz l’empereor.
L’empereriz Judith ne mist pas en oubli la besoigne que ele avoit devant commenciée ; car si comme nous avons ja dit, ele s’estoit conseillié au conseil du palais comment ele auroit en s’aide l’un des fiuz à l’empereor après la mort du pere ; derechief s’en ala aus barons
- ↑ « Avitam eis legem conservarent » (Vita Hludowici).
- ↑ Donat. Voir sur lui ci-dessus, chap. xv, p. 89, note 2.
- ↑ La Vita Hludowici donne son nom : « Adrebaldus Flaviniacensis monasterii abbas » (voir ci-dessus p. 121, note 8).
- ↑ Pépin Ier, roi d’Aquitaine, mourut à Poitiers le 13 décembre 838 (Hist. de Languedoc, nouv. éd., t. I, 2e partie, p. 1010, et t. II, p. 352 et suiv.).
