porta tout le mois de septembre. Vers la Saint Martin se traist à Es la Chapele pour yverner. Tout cel yver i demora et i celebra la sollempnité de Noël et de Pasques.
[1]Lors aparut ou ciel uns signes espoantables, que l’on apele l’estoile comete. Si dient li astronomien que ele segnefie mort de prince. Li empereres qui volentiers s’estudioit en tiex choses l’aperçut premiers. Tantost fist devant soi venir ii clers qui de cele art savoient et leur demanda que il leur sembloit de ce signe. Li uns de ces ii clers, si fu cil maismes qui ceste estoire escrist, si comme il dit là endroit. Lors li dist li clers que il attendist la response de ce que il demandoit jusques à l’endemain que il auroit mieuz l’estoile esperimentée et la segnefiance cogneue. Et li empereres cuida, si comme il estoit voirs, que il ne le deist fors pour passer et pour ce que il avoit paour que il ne fust contrainz à respondre tel chose que li empereres fust corrociez. Lors li dist : « Va tantost sus les murs delez ce palais et me saches à dire la verité de ce que tu auras veu, car je sai bien que c’est li signes et l’estoile dont nous avons aucune foiz parlé. Va donques, et si m’en saches à dire ce que il t’en semblera. » Lors li respondi li clers quant il out l’estoile veue : aucunes choses dist, et d’aucunes se tut ; et li empereres qui bien s’en aperçut li dist lors : « Une autre chose i a dont tu ne parles mie, car je sai bien cil signes segnefie mort de prince et mutation de regne. » Et li clers li mist avant l’auctorité du prophete, pour lui apaisier, qui dist ensi : N’aiez paour des signes du
- ↑ Vita Hludowici imperatoris, chap. lviii.
