[1]De Saint Denys se parti li empereres, son fil ne vot pas ensuivre, ja soit ce que maint li ennortassent. Par Nantuel[2] passa et s’en ala à Karisi[3]. Là atendi son fil Pepin et les barons qui sejornoient outre le flum de Marne, et son fil Looys qui à lui venoit et amenoit ovec lui touz ceus qui outre le Rim s’en estoient fui. Si avint ensi que tuit si ami vindrent à lui le diemence de la mi-karesme que sainte Eglise s’esleece et que l’on chante Letare Jerusalem[4], en segnefier la grant joie qui là fu à ce jor. Liement et debonairement les reçut li empereres, moult les mercia touz et leur rendi grâces de leur bone amor et de la foi enterine que il li avoient portée. Liement dona congié à Pepin son fil de repairier en Aquitaine, et aus autres dona ausi congié en grant devotion quant il s’en voudrent partir. De France se parti et s’en ala à Es la Chapele, là reçut sa fame l’empereriz Judith que Bonifaces[5] et li eveques Ratarz[6] li orent amenée de Lombardie où il l’avoient envoiée en essil, et Challot son petit fil que il avoit touz jors eu ovec lui. La Resurrection celebra à Es la Chapele. Après la feste s’en ala chacier en Ardane, et après la Penthecoste s’en ala vers Remerimont[7] pour deduire en chaces et en pescheries.
- ↑ Vita Hludowici imperatoris, chap. lii.
- ↑ Nanteuil-le-Haudouin, Oise, arr. de Senlis, ch.-l. de cant.
- ↑ Quierzy, Aisne, arr. de Laon, cant. de Coucy-le-Château.
- ↑ Le 15 mars 834.
- ↑ Ce comte Boniface, qui a déjà paru au chapitre xv, p. 94, était gouverneur de l’île de Corse.
- ↑ Rataldus (Vita Hludowici), Ratholdus (Annales de Saint-Bertin, année 834). Ce personnage, appelé Rothaldus par Gams (Series episcoporum, p. 805), aurait été évêque de Vérone de l’année 799 environ à l’année 840.
- ↑ Remiremont, Vosges.
