touz li empires et li roiaumes de France en grant temoute et en grant effroi. Li poples de France, de Borgoigne, d’Aquitaine et d’Alemaigne s’asembloient chascun en leur contrées et se complagnoient ensemble de la honte et des gries que l’on fesoit à l’empereor.
Guillaumes, li conoistables de France et li cuens Egebarz, traveilloient moult à ce que li empereres fust restabliz. Touz ceus que il savoient de ceste volenté alioient ensemble. Li cuens Berarz et Guerins refesoient ausi en Borgoigne ; le pople fesoient asembler et les atraioient à ceste acort, les uns par promesses, les autres par biaus amonestemenz, et les autres lioient par sairemenz. Loys, li uns des fiuz l’empereor, qui ja s’estoit tornez devers son pere, qui lors demoroit en Alemagine, et li evesques de Mez, Droves, qui freres estoit l’empereor, et maint autre, qui là s’en estoient fui, envoierent l’abé Huon[1] en Aquitaine à Pepin l’autre frere pour li atraire à leur partie.
[2]Quant li yvers fu trespassez et la novele saisons revenue, Lothaires prist son pere et se parti droit d’Aes et mut à venir droit à Paris. Parmi la terre de Habain[3] trespassa et fist asavoir à touz ceus que il cuidoit qui l’amassent que il venissent encontre lui à Paris. Mais li cuens Egibarz et li autre baron de cele contrée orent tandis assemblé granz genz. Encontre Lothaire s’en alerent pour delivrer l’empereor ; si eussent commencié ce que il avoient en propos. Mais li
