reriz Judith ma fame estoit vestue et voilée en une abbaïe de nonnains, et disoient que il cuidoient encore mieuz qu’ele fust morte. Et pour ce que il savoient bien que je amoie Challot, mon petit fil, seur toutes creatures, me disoient-il ausi que il estoit tonduz et vestuz comme moines ou covent de laienz. Et quant je oï ce, je ne me poi tenir de plorer, si n’estoit pas merveille, car je estoie deposez et getez hors de la dignité de l’empire et avoie perdue ma fame et mon douz fil.
Pluseurs jors fui en tel doleur et en criz et en pleurs ; si n’avoie nului qui de riens me confortast, et bien sentoie que je me degastoie touz et afebleoie durement pour le grant duel que je avoie. Si n’avoie confort de nului, fors de Dieu, car li huis et les entrées estoient si gardées que nus ne povoit à moi venir. Toutesvoies, i avoit-il une petite voie et estroite[1], par quoi l’on pooit aler ou covent des freres et en l’eglise ; mais ele estoit moult curieusement gardée. Là me porpensoi que je iroie, et quant je fui là venuz je m’agenouillai devant touz les freres et leur monstrai, comme à sages mires, la maladie et la grant plaie dont je me doloie, et leur priai moult devotement que il fussent en oroison pour moi envers mes segneurs, monsegneur saint Mahart et monsegneur saint Sebastien, et que il proiassent pour l’ame ma fame, car je cuidoie certainement qu’ele fust trespassée, si com il m’avoient fait entendant. Et li preudome, qui grant compassion
- ↑ Le sens du latin a été mal rendu. On dit que Louis le Débonnaire ne pouvait se rendre qu’à l’église et auprès des frères, mais peu souvent. « Ad ecclesiam tantum et ad fratres raro via, et ipsa cum summa prospectione custodum patebat. »
