Page:Viard - Grandes chroniques de France - Tome 4.djvu/140

Le texte de cette page a été corrigé et est conforme au fac-similé.

venuz, for pour metre pais et concorde entre lui et ses fiuz, car il avoit oï dire, ce disoit, que il estoit si esmeuz contre aus que il n’en voloit oïr nule proiere. Les causes et les raisons de l’empereor oï et demora ovec lui, ne sai quanz jors[1].

Au departir, li dist li empereres que quant il seroit retornez, que il porchaçast la pais envers ses fiuz. En tant de tens comme li Apostoiles ot demoré avec l’empereor, fu ja touz li poples tornez contre lui, et s’en estoit ja alez en l’ost de ses fiuz. Si avoient les uns atraiz par dons, les autres par promesses et les autres par menaces, ni li Apostoiles ne retorna puis à lui, si com il li avoit commandé, car si anemi ne soufrirent pas que il retornast.

Moult fu li empereres afebloiez quant si anemi li orent ensi forstraites les granz compagnies que il avoit amenées et le menu pople. Et quant ce vint à la feste Saint Pere et Saint Pol, la menue gent crioient contre l’empereor par flaterie, et d’autre part si fil le menaçoient que il corroient et feroient seur lui. Et li preuzdons qui bien vit que il ne porroit durer contre leur force se douta moult de la cruauté du menu pople. Lors, manda à ses fiuz que il ne fust pas livrez es mains de la menue gent, et il li remanderent que il issist de ses herbeges et venist contre aus, et il istroient contre lui. Ensi le convint faire. Encontre lui revindrent d’autre part et descendirent des chevaus quant il aprochierent de lui. Lors les amonesta que il gardassent vers lui ce que il avoient promis ; non mie vers lui tant seulement, mais vers sa fame et vers son fil, et il li respondirent que il fust aseur de ce que si feroient-il.

  1. On a dans le latin : « mansit cum eo aliquot diebus ».