empereres manda son fil Lothaire que il ne creust pas le conseil de ses anemis, ainz venist à li ausi comme li fiuz doit venir au pere. Toutes voies i ala contre la volenté des traiteurs qui moult en furent corrocié ; et li empereres parla à lui et si ne le reprist pas laidement ne asprement, ainz le chastoia doucement et cortoisement ; ovec lui, entra ou palais. Li poples qui dehors estoit se commença à esmovoir et à forsener contre lui et contre sa gent, et fust la forsenerie à ce montée que il se fussent entreoccis aus coutieus et aus espées, se ne fust li sens de l’empereor qui entendi la noise. Car ja estoient en tel point que il n’i avoit que du ferir quant li empereres et Lothaires se monstrerent aus fenestres du palais. Puis qu’il orent veu l’empereor et Lothaire ensemble et il ot à aus parlé, toute la forsenerie du peuple fu apaisiée. Touz les principaus de la traïson fist prendre li empereres et metre en prison. Après les fist venir à jugement ; et comme li droit et les lois donassent que il deussent tuit perdre les chiès, sa misericorde et sa debonairetez parfu si granz que il ne vot ainques souffrir que nus en receust mort ; ne ainques de si grant fait ne porterent autre paine, fors que li lai furent tondu en convenable lieus, et li clerc furent gardé en mostiers de religion.
