Tandis vint li messager devers Espagne et reporta certainement que li Sarazin et li Mor estoient venu bien avant a granz oz ; mais il s’estoient retrait arriers[1], ne à cele foiz ne beoient-il plus à faire. Quant li dui frere furent certain de cete chose, il se departirent. Si s’en ala Pepins en Aquitaine, et Lothaires retorna au pere.
Entre ces choses, avint que li dui fil le roi Godefroi de Danemarche chacierent hors dou roiaume Hariolz. Devant ce, avoient cil dui frere faites aliance à l’empereor. Et pour ce que il voloit aider celui Heriolt, il leur manda par aucuns contes de Saisoine que il le tenissent en pais et le receussent en autel amor et en autel compagnie com il estoit devant. Mais Hariolz ne pot pas tant atendre que la pais fust du tout confermée, ainz entra en leur terre, les proies prist et gasta, et ardi aucunes de lor viles. Cil cuiderent certainement que il eust ce fait par l’assent et par la volenté des genz l’empereor. Pour ce, passerent le flum d’Egidore[2] et vindrent soudainement sor iaus qui de tout ce ne se prenoient garde. En fui les chacierent, en leur tentes entrerent et ravirent tout quanque il troverent. Mais quant il orent après la verité seue, que Heriolz n’avoit pas ce fait par iaus, il se douterent moult du corroz l’empereor et que il n’en preist venjance. Pour ce, envoierent premierement à ceus à cui il avoient meffait, et puis à l’empereor, et recognurent bien que il avoient vers lui mespris, et prest estoient
