conte Asinaire deporterent pour ce que il estoit de leur lignage.
[1]Puis que Lothaires fu venuz à Rome, si com nous avons dit, li apostoiles Eugines le reçut moult honorablement. Ensi com il parloient i heure ensemble des choses qui estoient avenues, Lothaires li demanda pourquoi cil qui estoient ami et loial vers l’empereor et à ceus de France estoient occis, et cil qui pas n’estoient occis estoient gabé et escharni et despit des Romains, et pourquoi si granz quereles et si grant contenz estoient entre lui et les Romains. Mais au darrenier, fu la veritez seue et fu trové que cil dou pople avoient perduz pluseurs edifices, heritages et autres possessions par l’ignorance et la negligence de l’Apostoile et par la convoitise et la rapine des juges. Mais Lothaires fist rendre au pople possessions et heritages[2], et tout quanque on leur avoit tolu sanz raison. Moult en fu li poples liez et moult l’en sourent bon gré de ceste chose. Après ce, fu establi, selonc l’anciene costume, que cil qui de Rome seroient juge, convendroit que il fussent dou palais et dou costé l’empereor, et tiex qui feissent loial jugement ausi aus povres comme aus riches. Après ces choses ensi ordenées, repaira Lothaires en France, à son pere conta toutes ces besoignes qui moult fu liez de ce que mavestiez et tricherie estoit abatue et loiautez et justice soustenue.
