ment les fist amonester par les Saines que il guerpisissent lor desloiauté et venissent à li seurement. Mes cil qui en els meesmes se sentoient corpables et meffaiz n’oserent à li venir, jusques à tant que il lor promist pardon et misericorde que il desirroient moult, et jusques à tant que il orent par devers els ostages et seurté de lor vies. Ces ostages lor mena Amalimons[1], uns des princes du palais que li rois i envoia, et cil vindrent ovec lui, en la presence le roi, en une vile qui a non Attigni. Là furent baptizié et reçurent la foi crestienne ; car li rois mut à retorner en France quant il ot là envoié Amaulimont. Grant piece du tens se tint ensi en pais cele perverse nation. Pour ce meesmement que il ne pooient trover occasion ne raison de recommencier la guerre, et plus pour ce que il doutoient le roi pour sa fierté et pour ce que il li chaoit bien en toz ses faiz.
En cele année, avint que li François orientel conçurent male volenté contre le roi et firent conspiration contre li. De ceste traïson, fu principaus uns des contes du païs qui avoit non Hardrés[2]. Mais, puis que li rois en sot la vérité, la chose fu tost abaissié et atainte par son sens ; car il dampna toz ceus qui estoient parçonier[3] et consentanz de ceste traïson ; les uns dampna par essil, et aus autres fist les euz crever.
