En un des costez de ce mont, par devers Septentrion, estoient les herberges des Saines. Li cuens Theoderis fist tendre ses trés de l’autre part et li ministre le roi firent passer lor ost outre le flueve de Wisare, et se logierent en l’autre rive pour mieuz avironer la montaigne. Lors pristrent conseil ensemble coment il envaïroient lor anemis ; et pour ce que il se dotoient que la gloire et la loenge de la victoire ne fust donée au conte Theoderic se il se combatoient ensemble, il proposerent à combatre sanz li. Lors s’armerent comunement et issirent de lor herberges sanz conroi ; si aloient non mie ausi come se il deussent combatre à leur anemis, ordenez en bataille ; mais ausi come se il s’en deussent tantost fuir et il deussent praer lor despoilles. A espars coroient li uns çà, li autres là, et si tost come li cheval pooient corre, et lor anemi les attendoient au dehors de lor herberges à batailles ordenées. Et por ce que il venoient ensi confusement, se combatirent-il mauvesement ; car quant la bataille fu commenciée li Saine les acceinstrent tot entor et les occistrent presque toz ; et cil qui eschaper porent ne fuirent pas à lor tentes, mes aus herberges le conte Tyerri qui estoit logiez d’autre part de la montagne. Si fu li domages plus granz pour l’auctorité des princes qui là furent occis que pour le grant nombre des personnes. Car dui des messages le roi, Adagilles et Gilles[1], et iiii des contes et xx autres des plus nobles furent occis sanz le nombre de l’autre gent qui suiz les avoient et qui miez amoient à morir ovec els que vivre après lor mort.
- ↑ Le texte latin donne : « Legatorum duo, Adalgisus et Geilo ». Ce sont les personnages qualifiés plus haut : « Maistre chambellenc » et « conoistable ».
