Après ces noveles, li rois assembla parlement de sa gent en la cité de Garmacie, et ordena coment il peust plus hastivement ostoier en Saisoine. Ses oz assembla, et vint là où il baoit à aler si soudainement que il deffist et derompi tot le propos de ses anemis, et l’apareillement par quoi il li cuidoient contrester ; car quant il fu venuz à la fontaine de Lippie, il trova grant multitude de cele desloial generation qui moult estoient humble et devot par semblant, et dolent de ce que il avoient vers lui mespris ; merci li crierent et li promistrent que il recevroient saint baptesme et la foi crestiene. Li rois qui fu misericors et debonaires lor pardona. Tot ceus qui baptesme requistrent fist baptizier, et quant il ot lor fauses promesses oïes et lor sairemenz, et tiex ostages com il demanda receuz, il retorna en France. La sollempnité de Noël et de Pasques celebra en une cité qui avoit non Haristalle ; mais avant que il partist de Saisoine restora le chastel de Hereborc, que li Saine avoient abatu, et un autre en fonda sor le flueve de Lippie[1], et lessa dedenz grant garnison de la gent de France.
- ↑ Pertz, Scriptores, t. I, p. 157, n. 67, dans Monumenta Germaniæ historica, pense que ce serait Lippstadt, Allemagne, prov. de Westphalie, district d’Arnsberg.
