les victoires et les faiz de si grant prince pour ce que ses noms et sa renommée ne soit mise en obli, si que li roi et li prince crestien prengnent exemple à ses faiz et à sa conversation. Grief chose me semblast d’entrelessier ceste ovre par mon defaut et par ma negligence, quant je savoie que nus ne les pooit savoir plus certainement de moi qui present i avoie esté et veuz de mes propres euz, et bien pensoie que nus autres de moi ne les avoit escriz. Une autre cause raisnable me muet, qui bien doit souffire tote seule à ce que je soie tenuz à descrire sa vie ; ce que il me norri et la très grant amor que il ot toz jors à moi et je à li et à toz ses enfanz, puis cele houre que je commençai premierement à converser en son palais, qui me contraint et lie à ce que je monstre par ovres, après sa mort, la bone volenté que je oï à li quant il vivoit. Si seroie notez et corpables[1] d’ingratitude, se je ne me recognoissoie aus honors et aus benefices que il me fist en sa vie.
- ↑ Le royal ms. 16 G VI, fol. 124 vo, ajoute ici : « D’un vice que li clerc apelent ingratitude, qui vaut autant à dire comme rendre mal pour bien à son seigneur ou à son patron, et tel seroie-je, au mainz par ma deffaute ou par ma peresce, se je ne me recognoissoie, etc… » Cette addition se trouve aussi dans d’autres manuscrits. Cf. Recueil des historiens des Gaules et de la France, t. V, p. 225, n. d.
