[1]Au matin, s’armerent tuit et vindrent en la valée de Roncevaus, au lieu de la bataille, où li baron et l’autre chevalerie gisoient mort ; car la bataille n’avoit pas esté là où il troverent Rolant. Là trova chascuns son ami, dont li plusor estoient mort ; li auquent non, mais il estoient navré à mort. Le vaillant Olivier troverent mort, tout envers estendu ausi come en croiz, lié de iiii forz harz à iiii pieus fichiez en terre et escorchié de coutiaus aguz, du col jusques aus ongles des piez et des mains. En plusors lieus estoit tresperciez de saietes et de javeloz, et d’espées, et froissiez de cos et bastons.
Lors commença li plors et li criz merveilleus et horribles par toute la valée, si que les montegnes en resonerent. Chascuns regretoit son fil, ou son frere, ou son cousin, ou son ami. Lors jura li rois, par le Roi tout puissant, que il ne cesseroit de corre après ses anemis jusques atant que il les troveroit. Ses genz prist et se mist en l’enchauz ; là fist Nostre Sires, pour lui, aperz miracles, car li solauz se tint en ce point l’espace de iii jors. Tant les chaça que il les trova delez la cité de Sarragouce, les uns gisanz et les autres menjant sor le flueve d’Elbra[2]. iiiim en occist, et plusor se noierent ou flum, si comme aucun livre dient ci endroit. Après retornerent en Roncevaus, les morz et les navrez firent porter là où li cors de Rolant gisoit.
Lors fist li empereres enquerre se ce estoit voirs ou non que Ganelons eust Rolant et les autres barons traïz, si come l’on disoit communement parmi l’ost.
