premiere description et nous escrit toutes ses batailles et ses faiz jusques à l’estoire d’Espagne.
D’iluec en avant les print li arcevesques Turpins et les nous escrit jusques vers la fin de sa vie, certains de toutes les choses qui puis avindrent, come cil qui toz jors fu ovec lui, et dit ensi que Karlemaines estoit bruns de cheveleure et vermauz en face, nobles et avenanz de cors, mais fiers estoit en regardeure[1]. En estant avoit viii piez de lonc, à la mesure de son pié maismes qui moult estoit granz. Par piz et par espaules estoit très larges ; ventre et rains avoit convenable selonc son cors, gros braz et groses cuisses avoit. Très fort estoit de touz membres ; en bataille, chevaliers très aigres et très sages. De face, avoit paume et demie de lonc, de barbe une paume, de nés demie paume, de front un pié de lonc. Si ieul resembloient ieuz de lyons, ausi resplendissanz come escharbocles. Li sorcil deseus les ieus avoient demie paume de lonc. Tantost estoit espoantez cui il regardoit par mautalent ; nus ne pooit longuement demorer devant lui, cui il regardoit par corroz à ieuz overz. Li ceinz de sa corroie avoit viii paumes de lonc sanz ce qui pendoit dehors la bocle. Poi de pain menjoit, petit de vin et trempé bevoit. Bien menjoit un quart de moton, ou ii gelines, ou une oie, ou une espaule de porc, ou un paon, ou une grue, ou un lievre. De si grant force estoit plains que il copoit un chevalier armé ; c’est asavoir un de ses anemis seant sor son cheval, dès la teste jusques aus cuisses, à un sol cop, et lui et le cheval, de Joiouse s’espée. Les braz et les
- ↑ En regardeure, d’aspect.
