en ce maisme concile, que cele eglise fust toz jors mais apelée sieges d’apostre, pour ce que li cors monseigneur saint Jaque i repose, et que tuit li concile des prelaz d’Espagne et de Galice i fussent tenu, les dignitez et les croces donées et li evesque sacré, li roi d’Espagne et de Galice enoint et sacré par la main l’arcevesque du siege, en l’onor Dieu et de monseigneur saint Jaque l’apostre. Et se la foiz defaloit en autres citez et que questions fust meue sor aucuns articles, que ele fust reformée et reconciliée par l’arcevesque et par le concile du lieu. Et à bon droit, doit estre la foiz reconciliée et reformée en cele honorable eglise. Car ausi come Ephese est sieges d’apostre es parties d’Orient pour la raison de monseigneur saint Jehan, frere monseigneur saint Jaque, ausi doit estre est parties d’Ocident l’eglise de Compostele, sieges où la foiz soit reformée et reconciliée. Si sont li dui siege que la mere des ii fiuz Zebedée requist à Nostre Seigneur ; que li uns seist à sa destre et li autres à sa senestre de son regne.
En tout le monde n’a que iii sieges et iii eglises principaus qui, par excellence, sont honoré sor toz autres ; cele de Rome, de Compostele et d’Ephese. Si n’est mie sanz raison ; car ausi come Nostre Sires establi principaus saint Pere, saint Jaque et saint Jehan, et les honora plus que nus des autres, en ce que il lor reveloit ses secrez, si com il pert[1] par les Evangiles ; ausi vot-il establir que lor siege fussent honoré sor touz autres, et par raison sont-il dit principal ; car ausi come ci troi apostre orent plus de grâce et de dignité que li autre, ausi doivent avoir li
- ↑ Il pert, il paraît.
