Karlemaines, quant il oï ces noveles, ordena son ost pour chevaucher contre els à bataille. En ce que il s’aprochoit de la cité de Cordres, li dui roi issirent de la vile, tuit armé, à batailles rengiés et chevauchierent contre crestiens entor iii miles loin de la cité. Si estoient entor xm et li nostre entor vim. Lors devisa Karlemaines son ost en iii eschieles. La premiere fu de chevaliers très preuz ; la seconde de genz à pié et la tierce de chevaliers. Tout en autel maniere deviserent li Sarrazins lor genz.
En ce point que nostre premiere bataille dut assembler à la premiere des Sarrazins, une grant tobe de lor gent à pié se mist devant les chevaus de noz combateors, et avoit chascuns en sa teste une barboire[1] cornue, noire et horrible, resemblant à deable, et tenoit chascuns ii tympanes en ses mains que il hurtoient ensemble, et fesoient une noise et une temoute si grant et si espoantable que li cheval de noz combateors orent si très grant paor, que il fuirent arrieres ausi come tuit forsené[2], maugrez ceus qui les chevauchoient. Après la premiere, fuirent les autres ii, et coroient li cheval si tost come saiete novelement descochié. Moult estoient lié li Sarrazins de ce qu’il veoient. Lors commencierent noz crestiens à aler pas par pas, jusques à tant que noz genz vindrent à une montaigne qui estoit à ii miles de la cité. Là se rasemblerent li crestien et firent mur d’iaus maismes.
Derechief se mistrent en conroi[3] et les atendirent à
