ton et li torna la teste si forment ce devant darriers, que il chaïrent andui à terre. Tantost salirent sus[1] et monterent sor les chevaus ; vers lui s’en vint Rolant, l’espée traite, car il le cuida occierre ; à li falli, mais il feri le cheval si que il le copa par mi a i seul cop. Moult fu dolenz Fernaguz, quant ses chevaus fu occis et il fu à pié en mi le champ. Lors commença forment à menacier Rolant et s’en vint vers li l’espée traite ; mais Rolant qui le vit venir s’avança et le feri par mi le destre braz ; pas ne le navra, mais il li fist l’espée voler en mi le champ, et li geanz qui trop fu correchiez s’en vint vers lui, le poing clos, pour li ferir. A Rolant fali, mais il asena le cheval en mi le front et le feri si que il le rua mort. Ensi se combatirent tout à pié, sanz espées, jusques à l’eure de none, des poinz et des pierres qui estoient en mi le champ ; et quant ce vint vers le vespre, Fernaguz demanda trives à Rolant jusques à l’andemain. En tel maniere furent les trives prises que il vendroient l’endemain ou champ de la bataille sanz chevaus et sanz lances. A tant se departirent ; si retorna Rolant à l’ost et li geanz en la cité.
L’endemain, bien matin, revindrent ou champ si come il avoient devant devisé, mais Fernaguz aporta s’espée toutesvoies et Rolant aporta i baston tors, lonc et gros, dont il se combati tote jor à li ; mais ainques blecier ne le pot, pour ce que il estoit trop bien armez. Ou champ, avoit planté de pierres grosses et roondes, dont Rolant le feroit sovent et cil le consentoit aucunes foiz, ne ainques navrer ne blecier ne le pot. Ensi se combatirent jusques au midi que li
- ↑ Tantost salirent sus. Ils se relevèrent aussitôt, « statimque elevantur a terra ambo pariter ».
