Page:Viard - Grandes chroniques de France - Tome 3.djvu/274

Le texte de cette page a été corrigé et est conforme au fac-similé.

pas à mengier. » Pour ce, devons regarder que la foiz et la loys Nostre Seignor vaut petit au crestien se ele n’est aemplie par ovres, selonc l’apostre qui dit que ausi come cors est morz sanz ame, ausi est foiz morte sanz bone ovres. Et ausi come li rois païens refusa baptesme pour ce que il ne vit pas en Karlemaine droites ovres, ausi me dout-je que Nostre Sires ne refuse en nous la foi du baptesme au jor du joise, pour ce que il n’i trovera pas les ovres.


VI.
Li VI parole coment tuit li Sarrazins furent desconfit et Aigolant occis, fors aucuns qui eschaperent ; coment François furent occis par lor covoitise quant il retornerent par nuit ou champ de la bataille ; coment li rois Forrez se combati à Karlemaine, et coment il et sa gent furent occis, et puis de ceus qui morurent sanz bataille.

[1]L’andemain vindrent tuit armé pour combatre ou champ de la bataille, d’une part et d’autre, par le convent des ii roys[2]. Li nombres de la gent Karlemaine estoit esmez[3] à c et xxxiiiim ; de la gent Aygolant à cm. iiii batailles firent li crestien de toute lor gent et li Sarrazin v. Cele qui premiere assembla à nostre gent fu tantost vaincue. Après vint la seconde qui tantost refu desconfite. Quant li Sarrazin virent que il perdoient ensi, il mistrent lor autres iii batailles en une, et Aygolant au milieu ; et quant li crestien virent ce, si les

  1. Turpini historia Karoli magni, chap. xiv.
  2. Ms. S. G. : loys.
  3. Esmez, évalué.