pour ses oz assembler, Aygolant se porchaça de toutes parz et asembla merveilleusement granz oz de diverses nations ; Mors, Moabithiens, Ethiopiens, Sairans, Turs, Aufricans et Persanz[1], et tant de rois et de princes sarrazins com il pot avoir de toutes les parties du monde. Thexophine, le roi d’Arabe[2] ; Buriable, le roi d’Alixandre[3] ; Avithe, le roi de Bougie ; Hospine, le roi d’Agabibe[4] ; Fantime, le roi de Barbarie ; Allis, le roi de Marroc[5] ; Maimone, le roi de Meque ; Ebrechim, le roi de Sebille, et l’aumaçor de Cordres[6].
Ensi vint Aygolant a touz ses oz jusques à une cité de Gascogne qui a non Aggenni[7], et par force la prist. Lors manda Aygolant à Karlemaine que il venist à li paisiblement, a petite compagnie de chevaliers, en prometant que il li donroit or et argent et lx chevaus charchiez d’autres richeces, se il voloit tant seulement estre sogiez à li et obeir à ses commandemenz. Pour ce le mandoit que il le voloit cognoistre et que il le peust plus legierement occire en bataille. Mais Karlemaines, qui bien pensoit la malice, prist ovec lui iim des plus esleuz de sa gent et vint prez[8] à iiii miles de la cité d’Agenes où Aygolant et ses oz estoit. Repostement
- ↑ On a seulement dans le texte latin : « Ethiopes, Pardos, Affricanos, Persas. »
- ↑ « Texephinum regem Arabum. »
- ↑ Alixandre, Alexandrie.
- ↑ « Ospinum regem Agabiæ », roi de l’Algarve, auj. prov. de Faro (Portugal).
- ↑ Le texte latin donne en plus ici : « Aphinorgium regem Maioricæ. »
- ↑ « Altumaiorem regem Cordubæ », Cordoue.
- ↑ « Et venit usque ad urbem Gasconicam Agenni (Agen) et cepit eam. »
- ↑ Ms. S. G. : après.
