cors repose, qui tantes citez et tantes regions as conquises en ton tens. Pour laquel chose je te faz asavoir que autresi come Nostre Sires t’a fait puissant sor touz autres rois terriens, ausi t’a-il esleu à delivrer ma terre des mains des Sarrazins et à faire la voie aus pelerins, là où mes cors repose, pour ce que il te doinst corone de victoire en la joie de paradis. Et cil chemins d’estoiles que tu as veu ou ciel senefie que tu iras a granz oz en ces parties pour destruire la paiene gent et pour delivrer ma terre et ma sepouture des mains des Sarrazins, et que tuit li pople qui habitent de l’une mer jusques à l’autre et en autres diverses regions iront après toi en pelerinage pour empetrer vers Nostre Seigneur pardon de lor pechiez ; et puis, le tens de ta vie jusques à la fin de cest siecle, raconteront les vertuz et les miracles que Nostres Sires a faiz pour ses amis. Apareille-toi donques et muef[1] au plus tost que tu porras, car je serai en t’aide par touz periuz ; si sera tes nons touz jors mais en loenge et si empetrerrai vers Nostre Seigneur à toi corone perdurable en la joie de paradis. » En tel maniere s’aparut mesires saint Jaques par iii foiz à Karlemaine.
Quant Karlemaines ot ce oï, il fu moult liez et meesmement de la promesse que li apostres li ot faite de la joie de paradis. Ses oz asembla de toutes parz et entra moult efforciement en Espagne pour destruire les anemis de la foi crestiene et pour assaucier le non Jhesu Crist.
[2]Pampelune fu la premiere citez que il aseist ; iii mois i sist, ne prendre ne la pot, car ele estoit
