mais, il et lor hoir, iii deniers de lor chiés par non de servage[1].
Que vous conteroit-on plus ? Tant assembla du pople de toutes manieres de genz, en assez poi de tens, que il ot plus grant ost et plus fort que il n’avoit ainques eu devant. À la voie se mist li empereres et toz ses oz. Nous ne poons pas raconter toutes les choses, ne les aventures qui lor avindrent en cele voie, car trop seroit la matiere longue. Mès une aventure raconterons qui à l’empereor avint, qui bien est digne de memoire.
En cele voie de Jerusalem, est un bois qui bien dure ii jornées. En cele forest conversent moult de manieres de bestes sauvages qui, naturement, desierrent sanc humain[2] et devorent genz, meesmement quant eles sont afamées, come grifon, ors, lyon, linces, tygre et moult d’autres manieres de bestes sauvages. En ce bos entra li rois et ses genz. Au bien matin s’aparellierent ; si le cuidoient bien trespasser en un jor. Tote la jornée errerent jusques au vespre, tant que li bos qui de soi estoit oscurs, pour la plenté des arbres, se commença encores plus à en oscurcir quant la clarté du jor falli. Leur droit chemin perdirent ; par montaignes et par valées commencierent à aler parmi les bos. Lasse furent et travaillié li home et li cheval, tant pour la pluie qui sor els chaoit, come pour l’annui de ce que il ne savoient quel part il deussent torner. Et quant il parfu nuiz oscure, li empereres et li oz se herbergierent[3].
