cardinaus et du clergié, et le reçut ensi com il descendoit de son cheval en rendant loenges à Nostre Seigneur. Ensi le menerent jusques dedenz l’eglise. Ce avint, que je conte, en viiie kalende de decembre[1]. vii jors après que il fu là venuz, il fist assembler l’apostoile et les cardinaus et les autres prelaz, et lor conta en audience la raison por quoi il estoit là venuz, et aus autres jors après commença la besoigne qui estoit cause de sa voie. Mes trop li fu griés cele besoigne à commencier, car ce estoit pour enquerre des crimes qui à l’apostoile estoient mis sus. Et quant nus ne fu qui avant se traisist por ces crimes prover, li apostoiles prist en ses mains le tiexte des Euvangiles et monta en haut, ou letrun, devant tout le pople, le non de la Sainte Trinité apela et se purja des crimes dont il estoit fausement acusez[2]. En ce jor meesmes vint à Rome li prestres Zacharies que li rois ot envoié en Jerusalem ; ovec soi amena ii moines, messages du patriarche qui de par lui aportoient les clés du Saint Sepulcre et de Montecalvaire, et une enseigne de soie. Li rois reçut les messages et les presenz moult debonnairement, et quant il orent demoré à sa cort tant com il lor plot, il les congea et lor dona de ses richeces.
Page:Viard - Grandes chroniques de France - Tome 3.djvu/127
Le texte de cette page a été corrigé et est conforme au fac-similé.
