ostages com il vot demander. Quant li autre roi et li autre prince de la terre virent ce, il vindrent au roi à l’example de celui et li firent homage et seurté tele come li rois commanda.
Quant li rois ot ce fier pople sozmis et donté en la maniere que vos avez oï, il retorna arriers par cele maisme voie que il ot alée ; aus ponz que il ot faiz sor le flueve d’Albe passa et, si com il passoit parmi Saisoigne, il ordenoit des besoignes selonc la necessité du tens.
En France retorna et celebra la sollempnité de Noël et de Pasques en la cité de Warmaise.[1]Ainques n’ostoia li rois de tote cele année ; en cele cité reçut et oï les messages des Huns, et les siens renvoia à lor princes. La raisons pourquoi cil message estoient ensi envoié d’une part et d’autre, si estoit pour les termes et pour les devises de lor roiaumes et de lor regions. Cist contenz et ceste discorde fu commencemenz et naissance de la guerre qui fu faite contre les Huns. Et pour ce que il ne semblast que li rois despendist endementres le tens en oisouse[2], il se mist à navie ou flum de Muese[3]. En Germenie s’en ala en un lieu qui avoit non Salz[4] ; là avoit fait un moult riche palais sor le flum de Salahm[5]. Là demora tant come il li plot, puis retorna arriers par cele iaue meismes en la cité dont il estoit
- ↑ Annales d’Éginhard, année 790.
- ↑ En oisouse, dans l’oisiveté, « ne quasi per otium torpere ac tempus terere videretur » (Éginhard).
- ↑ Il faut le Mein, « per Mœnum fluvium » (Éginhard).
- ↑ Salz, auj. Kœnigshofen, ville de Bavière située dans le Grabfeld, sur la Saale franconienne.
- ↑ Salahm, la Saale franconienne, rivière de Bavière, affluent de droit du Mein.
