Puis, declinant vers sa vieillesse.
Devint un insigne volleur.
Mais jamais il ne se dira de luy les choses que quatre des meilleures provinces de nostre France publieront à l’advenir de vous, et je voy l’heure qu’un de ces matins qu’on fera une telle perquisition de vostre vie enragée et de tant de volleries que vous avez faictes contre la volonté des dicts sieurs les princes, car je le croy ainsi, qu’il ce fera une telle execution de vos charongnes qu’il n’y aura rien d’oublié du pareil qu’il se fit durant les derniers troubles, à la penderie de Bretaigne faicte par le comte de Lamoignon, commandant pour lors à un regiment pour feu monsieur le duc de Mercœur. Cela vous est tout acquis, et n’en esperez pas moins, car vous meritez cent fois plus, et ne sçay ce que c’en sera. Sa Majesté en reçoit tous les jours des plaintes et recevra encore plus que jamais d’oresnavant, par tant de familles que vous avez ruinées et mises au blanc. Telle sera vostre fin, telle la recompense de vos beaux faicts, tels les salaires de vos courses, et tel le prix destiné aux plus cruels et felons voleurs du monde, ainsi que chacun vous a recogneus.
