veulent avoir beaucoup et se faire voir tous luisans en pierreries, ils doivent faire deffenses à leurs subjects d’en porter. Mais c’est la coustume de France que le gentilhomme veut faire le prince, et, s’il voit que son maistre se pare de pierreries, il en veut aussi avoir, deust-il vendre sa terre, son pré, son moulin, son bled ou son bois, ou s’engager chez le marchant. Les princes ne devroient tant reluire ny paroistre par pierreries que par la vertu, et sont assez cogneuz, respectez et regardez par leur rang et authorité, sans desirer d’estre davantage veuz par la lueur des pierreries precieuses. Les grands princes de jadis ne s’en soucioient pas beaucoup ; mais depuis, ayans gousté les délices du monde, ils en ont voulu avoir en abondance et s’en parer, pensans par là se rendre plus vénérables à leurs peuples. Cela est bon en eux, si les petits compagnons ne vouloient les ensuivre en ceste despense, laquelle il faudroit deffendre bien estroittement, et lors on ne verroit point tant de pierreries faulses qu’on en voit aujourd’huy, et si ne seroient pas si chères, pource qu’il n’y auroit guères d’hommes qui en achetassent.
Les impositions et gravesses mises sur le peuple, et les tailles excessives, aydent grandement à la cherté, comme il a esté dit cy dessus ; le remede desquelles aussi consiste en la benignité du roy, en laquelle nous devons tant esperer, qu’estans ostées les causes pour lesquelles il les a imposées, qui sont les guerres civiles et le payement de ses debtcs, il en deschargera son pauvre peuple, qui de ceste
