Page:Variétés Tome VI.djvu/83

nez quelque pitié de leur zèle et les randez à leurs femmes, qui les attendent à cuisses ouvertes, sicut terra sine aqua ; à leurs enfans, qui les auront tantost mescogneus ; à leur bercail, que le loup a beau infester tandis que le pasteur s’endort à l’ombre. Je vous demande ce surcroy d’obligation pour eux, et promets en tout cas en faire mon propre debte, la peine qu’ils ont prise pour moy, qui fais plus qu’il plaist à Dieu. Une partie du public merite bien ce petit tesmoignage de recognoissance, qui ne sera pas le dernier que j’espère leur rendre. Je reserve le remerciement et la louange deue à leurs sainctes intentions et à la sincère sollicitude avec laquelle ils ont cooperé au salut de la France après que je me seray dechargé envers Vostre Majesté des actions de graces qu’exige de tout vostre peuple ung si grand et si signalé benefice, et que j’auray acquitté les vœus que j’ay faits avec tous vos fidelles subjects pour l’accroissement de vostre gloire et continuation de toute prosperité en vostre royalle maison. J’ay dict.