gnant le nez comme rhinoceros eschauffez et disant : Voilà de beaux gratte-boyaux ! voilà de braves joueurs ! Vrayment, Herpinot touche bien mieux les boyaux que cela et a bien une autre eloquence. C’est dommage que l’espousée n’en a tasté : jamais ne voudroit d’autre joueur. Oh ! que n’est-il icy ? Nous aurions bien du contentement. Je voudrois m’en avoir cousté cent mille gigos, monnoie de Flandre, payez tous en cars d’escus, et deussions-nous les emprunter au magasin du grand Turc, à rendre d’aujourd’huy en un an. Ma foy, nous aurions nostre contentement. Et par ainsy le sieur Herpinot est honoré des dames pour sa vaillantise et bonne renommée. Qu’un chacun fasse de mesme, et il aura l’honneur, comme luy, tant des femmes que des filles.
Aux Dames.
Dames de quy la bienveillance
Honore le pauvre Herpinot,
Je vous promets sa diligence,
Ainsy que faisoit Adenot,
Alors qu’amoureux il estoit
De la deesse Babillette,
Quy estoit gaie et godinette,
Pour la grant amour qu’elle avoit.
Voyant la grace et le maintien
De son amoureux si fidelle,
Ne demandoit point de querelle,
Mais vouloit voir son entretien.
