On l’accuse de tous costez,
Et des collets qu’elle a gastez,
Et de la peine qu’elle donne ;
Mais, son esprit suivant ses yeux,
Elle est sourde, et n’entend personne
Que ses desirs trop curieux.
Qu’Aminthe sera regardée !
Mais je n’en ay point de soucy,
Pourveu qu’on n’emporte d’icy
Que sa memoire et son idée ;
Pourveu qu’elle garde sa foy,
Sa constance et ses feux pour moy,
Je me plairay dans sa victoire,
Et ceux que j’en verray mourir,
Je m’empescheray bien de croire
Qu’ils en puissent jamais guerir.
Ce fanfaron croit que les dames
Ne vont au Cours que pour le voir,
Et qu’on ne peut pas concevoir
Combien il leur donne de flame.
Ce cavalier vit de credit,
Car ces jours passez il perdit
Tous ses biens dessus une carte.
Cet autre, durant tout le Cours,
N’a songé qu’a la fièvre quarte,
Qui l’a quitté depuis huict jours.
Considère cette mignarde :
Elle a de quoy se faire aymer,
Et ses yeux me pourroient charmer
