Voix consonante proprement
Pour chanter sur ung instrument.
Voix argentine, haulte et clere,
Ta bonne grace me declaire,
Que tu ne chantes pas sans art,
Et que tu n’aymes le hasard
Du chant à plaisir sans mesure,
Comme est des bestes la nature.
Voix asseurée à entonner,
Voix distincte, et qui a bon air :
Voix de femme, gresle, et delivre
Chantant son party sur le livre.
Voix dont on dit, sans flater rien :
C’est elle, ô qu’elle chante bien.
Voix bien remettant les parties
Qu’aux assistans sont desparties.
Voix ravissant le cueur, au corps
De ceulx qui oyent tes doulx accordz.
Voix que d’ouyr [1] j’ay plus de cure
Que de Orpheus, Pan, ne Mercure.
Voix de celle qui prent tout jour
Chanter, pour honneste sejour.
O (donq) voix qu’aymes la Musique
Je te prye n’estre si rustique
De l’estimer à deshonneur
Ains a vertu, grace, et bonheur.
- ↑ Le texte de 1550 donne ce mot : d’avoir.
