D’aucune faulte convaincu,
Mais un cueur qui a bien vescu,
Et qui donne à ce mien corps vie
Qu’il perdra avant qu’il desvie.
Parquoy mon cueur en estant sien
Tu me feras demeurer tien.
Mais si sans luy tu demeuroys,
Sans luy et sans moy tu seroys :
Ainsi mon cueur, il luy fault dire,
Cueur qui nous peulx vie interdire
Et qui la peulx continuer,
Augmenter, ou diminuer,
Cueur, corps et esprit on te livre
Pour tousjours avecques toy vivre.
BLASON DU LA MAIN
Chapu[ys]
doulce main, main belle, main pollie,
Main qui les cueurs faict lier et deslie,
Main qui le mien a prins sans y toucher ;
Main qui embrasse et semond d’approcher ;
Main qui a moy doibs ouvrir (ô main forte)
Qui fors à moy, à tous ferme la porte ;
Main qui souvent en estraignant le doigt,
Sans dire mot, m’as dit je sçay bien quoy.
Main qui la trousse et flesche, sans doubter,
A Cupido seule pourroys oster ;
Dy-je la main que Cupido feroit
Mouvoir d’amour, quant il la toucheroit.
