BLASON DU SOUSPIR
S[c]æve
uant je contemple a part moi la beaulté
Qui cele en soy si grande cruaulté,
Je ne puis lors bonnement non me plaindre,
Et par souspirs accumulez estaindre
Ce peu de vie, et presque tyrer hors
L’ame gisant en ce malheureux corps :
Comme par ceulx qui du centre procedent
Où mes tourmentz tous autre maulx excedent.
Donc, ô souspirs, vous sçavez mes secretz
Et descouvrez mes douloureux regretz :
Quant vous sortez sanglantissans du cueur,
Jusqu’à la bouche esteincte par langueur.
Où allez vous, souspirs, quant vous sortez
Si vainement que rien ne rapportez,
Fors un desir de tousjours souspirer,
Dont le Poulmon ne peult plus respirer ?
Souspirs espars qui tant espais se hastent
Que pour sortir en la bouche ils se battent,
Ne plus ne moins qu’en estroicte fournaise
L’on voit la flamme yssir mal a son aise.
Souspirs soubdain et vistes, et legiers,
Souspirs qui sont desloyaulx messagiers.
Ha qu’ai-je dit ? desloyaulx, mais fidelles
S’entretenans par distinctes cordelles,
A celle fin que point ne m’abandonnent
Et que tousjours soulagement me donnent.
