Donc beaulx cheveulx, plus reluysans qu’or fin,
Desquelz ne puis, ne pourroys faire fin,
Je vous supply en voz tresses dorées,
Par mille nœudz haultement décorées,
Tenir lié ce mien cueur despourveu
Avec les yeulx de ceulx qui vous ont veu.
BLASON DU FRONT
S[c]æve
ront large, et hault, front patent et ouvert,
Plat et uny, des beaulx cheveulx couvert :
Front qui est clair et serain firmament
Du petit monde, et par son mouvement
Est gouverné le demeurant du corps,
Et à son vueil sont les membres concors,
Lequel je voy estre troublé par nuës
Multipliant ses rides très-menuës,
Et du costé qui se presente à l’œil,
Semble que là se lieve le Soleil.
Front eslevé sus ceste sphère ronde,
Où tout engin, et tout sçavoir abonde.
Front reveré, front qui le corps surmonte,
Comme celluy qui ne craint rien, fors honte.
Front apparent affin qu’on peust mieulx lire
Les loix qu’amour voulut en luy escrire,
O front tu es une table d’attente,
Où ma vie est, et ma mort très-patente.
