que nous partirons d'icy, afin que, si elle change d'advis, elle ne sçache où vous trouver pour s'en desdire, que pour le moins vous n'en ayez desja faict l'ouverture à quelqu'un de ses parens.
Telle fut l'opinion de Leonide, que Paris resolut de suivre entierement, et cependant qu'ils discouroient ainsi, Adamas avec toute la trouppe se joignit à celle d'Alexis et des bergeres qui estoient avec elle. Et parce que Silvandre s'estoit rendu fort hardy pour les discours qu'il avoit ouys, aussi-tost que les premieres salutations furent faictes, s'approchant de Diane : Ma maistresse, luy dit-il tout haut, je ne refuse point le jugement de celles que vous m'avez ordonnées, pourveu que vous en fassiez de mesme. - Il ne faut point douter de moy, respondit Diane, puis que j'ay esleu les juges, et que j'ay toute la raison de mon costé. - Ce different, reprit Silvandre, n'a pas besoin de tant de paroles que celuy qui a esté entre Phillis et moy ; c'est pourquoy je requiers que, sans aller plus loing, nous soyons jugez. - Je n'en finiray jamais la conclusion, dit-elle, puis que je l'espere du tout à mon advantage. - Quant à moy, repliqua Silvandre, je prends tout mon droit de la permission que vous m'avez donnée, car il est certain qu'il n'y avoit plus de raison pour moy qui me permist de continuer comme j'avois vescu avec vous depuis la gageure de Phillis, n'eust esté que vous m'avez fait cette grace de pouvoir
