Page:Urfé - L’Astrée, Troisième partie, 1631.djvu/990

amené icy cette belle Diane, puis que sans moy elle seroit encores dans le logis, et vous seriez privé de sa veue ? - Madame, respondit le berger, vous ne sçauriez me rendre tant de bons offices que le visage que vous avez ne m'en promette encores d'avantage. Alexis feignant de ne le point entendre : Et pourquoy ? dit-elle, mon visage vous fait-il tant de promesses ? - Parce, repliqua Silvandre, que vous me permettrez de dire que vous avez, madame, le visage d'un berger qui n'eust pas mis seulement ses soings et sa peine pour moy, mais la vie aussi pour mon contentement. - Je suis bien aise, respondit Alexis, que la nature m'ait donné cette marque d'une personne que vous aymez si fort ; car je ne doute point qu'encore que je ne le merite, vous ne laisserez pas de m'aymer aussi pour l'amour de luy. - Mais, madame, reprit Silvandre, ce seroy luy maintenant, s'il vivoit, qu'il faudroit que j'aymasse pour l'amour de vous, vos merites estans tels, qu'il n'y a rien qui ne leur doive ceder. Et pour vous faire voir combien j'estime veritable ce que je dis, je veux mettre ma vie entre vos mains, s'il vous plaist de prendre la peine de juger d'une chose qui m'est plus chere que la vie propre. - Berger, reprit incontinent Diane, pourquoy voulez-vous changer les juges que nous avons desja esleuz ? Ce n'est pas que je refuse tout ce qu'il plaira à la belle Alexis d'ordonner de moy, mais il me semble que c'est signe de cognoistre sa cause