Contraires effects d'amour.
Faire vivre et mourir avec un mesme effort,
Embraser tous les cœurs, et n'estre que de glace,
S'armer en mesme temps de douceur et d'audace,
Et porter dans les yeux et l'amour et la mort ;
Attirer tous les cœurs d'un extreme transport,
Et les desesperer d'obtenir quelque grace,
Du bon-heur au mal-heur ne mettre point d'espace,
Et joindre en un subject ces contraires d'accord ;
Mais languir au rebours d'une amour trop extreme,
Brusler sans que ce feu s'allume qu'en soy-mesme,
Pour revivre en autruy vouloir mourir en soy,
Et pour gage donner et son cœur et son ame,
Que je puisse mourir, si ce n'est vous, madame,
Et remourir encor, si c'est autre que moy !
Alexis qui aimoit ce berger comme celuy que dés long temps elle avoit tenu pour l'un de ses meilleures amis : Et bien ! Silvandre, luy dit-elle, ne m'estes-vous pas fort obligé de vous avoir
