ne fit pas long temps sans rencontrer l'arbre à main droicte, où deux jours avant son malheureux accident, elle avoit gravé les vers qui tesmoignoient avec combien de contrainte il feignoit de vouloir du bien à la bergere Aminthe ; et soudain, y jettant les yeux dessus, ô combien ceste veue luy donna de mortels ressouvenirs ! Peut-estre que la lecture de ces paroles luy eussent faire dire quelque chose assez haut pour estre ouye de ces bergeres qui la suivoient, si de fortune en mesme temps Silvandre, qui n'estoit pas loing de là, ne se fust mis à chanter. Et parce que la voix venoit du costé où ces bergeres estoient, Alexis tournant la teste de son costé, les apperceut non point trop esloignées. Elle fut marrie de les voir pres d'elle sans s'en estre apperceue, craignant que sa passion ne luy eust faict dire quelque parole, ou fait faire quelque action qui peust leur descouvrir ce qu'elle vouloit tenir caché ; mais ce qui la mettoit en peine estoit de sentir les yeux pleins de larmes, et lesquelles elle ne pouvoit cacher pour estre trop surprise.
Toutesfois, feignant promptement de le toucher, elle se tourna de l'autre costé, et s'essuyant les yeux le mieux qu'elle peut, et reprenant son bon visage, s'en vint leur donner le bon jour, les appellant paresseuses, et feignant qu'il luy avoit esté impossible de dormir, depuis que les oyseaux avoient commencé de chanter à la fenestre de la chambre. - Cela, madame, dit Astrée,
