me rends-tu pas les mesmes bons offices que tu faisois en ce temps-là, en me donnant tous les jours une nouvelle asseurance de la bonne volonté de ma bergere, puis que tu ne me revois pas avec moins d'amour, ny moins d'affection ? O dieux ! je t'entends bien ! ô saule bien aymé ! tu veux dire que si le cœur de ceste belle bergere eust esté aussi arresté par les services que je luy ay rendus que tu l'es par tes racines, tu me presenterois ce matin aussi bien que tu faisois en ce temps-là tous les jours une de ses lettres, ou plustost les chers tesmoignages de sa bonne volonté, mais que, comme du temps que j'estois si heureux, tu ne m'as jamais voulu tromper, de mesme ne le feras-tu point à ceste heure que le mal-heur m'accompagne avec tant d'opiniastreté !
Pour peu qu'elle eust proferé ces paroles plus haut, ces belles bergeres les eussent ouyes, mais de bonne fortune, elle n'ouvroit point la bouche, et c'estoit sa seule pensée qui les alloit redisant. Et parce qu'elles ne voulurent interrompre les douces imaginations qu'elles pensoient qui fussent avec, elles s'arresterent, et lors que la druide marchoit, elles en faisoient de mesme, non pas pour descouvrir ce qu'elle avoit en l'ame, mais seulement pour ne la point divertir par leur presence d'un entretien qu'elles jugeoient luy estre si aggreable.
Alexis donc, pensant estre seule, continuoit ses pensées et ses pas le long de ce petit ruisseau, ce qu'elle
