patrie,
Attendant un heureux retour,
Le larcin est nostre industrie,
Mais qui ne sçait que de l'amour,
Puis qu'ainsi veulent les destins,
Les dons ne sont que des larcins ?
Apres que ces Egyptiennes eurent finy leur bal, elles se mirent parmy la trouppe, donnans la bonne fortune à ceux qui leur presentoient les mains, et cependant il y en avoit tousjours quelqu'une qui alloit desrobant ceux qui demeuroient trop attentifs aux discours de leurs compagnies. Et ce passe-temps ayant duré fort long-temps, Adamas fut d'opinion que chacun se retirast, voyant mesme que la minuict s'approchoit, et de ceste sorte chacun se separa et s'en alla en son hameau. Phocion emmena chez luy Adamas, Paris, Alexis et Leonide, bien marry de ne pouvoir aussi loger Daphnide et Alcidon et leur compagnie. Mais Adamas ayant desja bien jugé qu'il ne le pouvoit faire sans se beaucoup incommoder, avoit ordonné que Lycidas les logeroit dans la maison de Celadon, où Diamis, son oncle, les attendoit, et qui pour son vieil aage n'estoit voulu venir veiller ce soir, s'asseurant bien que Lycidas ne manqueroit pas de satisfaire en sa place. Ce que le berger fit fort à propos, quoy qu'il luy faschast grandement de n'accompagner sa chere Phillis en sa cabane.
