d'envier ce que tu reproches en moy, puis que tu as bien voulu courre contre les autres bergers pour avoir la gloire d'estre plus leger qu'ils ne sont. - Tu te trompes, respondit Silvandre, je n'ay pas couru pour faire paroistre d'estre plus leger, mais ouy bien plus desireux de m'approcher le premier de ma belle maistresse, qui estoit assise aupres des termes où nous adressions nostre course, de sorte que tu es bien deceu, si tu penses que j'aye couru pour avoir la gloire de courre le mieux, mais seulement pour faire voir qu'il n'y a rien qui me puisse devancer quand il faut que j'aille vers elle.
De fortune Diane estoit aupres de cette troupe, et ouyt leurs discours, qui fut cause que s'adressant à Silvandre : Berger, luy dit-elle, ces noms de maistresse et de belle que vous me donnez, et ces paroles qui tesmoignent une affection particuliere, ont esté de saison, lors qu'a duré la gageure que vous aviez faite; mais maintenant je vous supplie de n'en plus user, si vous ne me voulez desobliger, et vous ressouvenir, quand vous voudrez me nommer, que, comme je vous ay desja dit, je m'appelle Diane. Silvandre luy respondit : Celuy qui n'est au monde que pour vous faire service, aymeroit mieux la mort que de vous desplaire, mais avant que de me faire ce commandement, permettez que j'aye tout le reste du jour pour me desaccoustumer de ces paroles qui vous sont tant ennuyeuses ; et cependant ayez agreable cette couronne que j'
