a gaigné. - Vous donnez vostre jugement, dit Adamas en sousriant, avec un peu trop de precipitation, car vous condamnez un homme sans l'avoir ouy. Silvandre n'a point parlé encores. - Il est vray, respondit Hylas, mais il ne faut pas s'arrester à si peu de chose, car je sçay bien qu'il ne peut rien respondre qui vaille.
Chacun se mit à rire des discours d'Hylas, et lors que chacun se fut teu, Silvandre reprit froidement la parole de cette sorte.
Response du berger Silvandre sur le jugement de Diane
J'ay appris dans les escoles des Massiliens que Promethée fut d'un esprit si subtil qu'il monta au ciel, et desroba le feu des dieux avec lequel il anima la statue qu'il avoit faite, et que, pour punition de ce larcin, il fut attaché sur un rocher où une aigle luy devore continuellement le foye. Ne courray-je point cette mesme fortune si, declarant les intentions de ceste belle Diane, je luy desrobe le secret qu'elle a voulu reserver à elle, puis que je n'estime pas ce larcin moindre que celuy de Promethée, ny fait contre une moindre divinité. Mais aussi ne seray-je point complice à celuy de Phillis, qui se veut injustement attribuer ce qui ne luy est point deu, et à mon desavantage, et contre l'equité, et le
