c'est moy qui suis declarée la plus aymable, et c'est à moy à qui le siege de Diane a esté donné, comme à celle qui le merite le mieux, et pour faire entendre que c'est à moy à qui Silvandre doit rendre les mesmes devoirs et les mesmes honneurs que nostre maistresse avoit auparavant receus de nous. - O bergere ! s'écria Silvandre, que ce mystere est profond, et qu'il vous faut encore estudier long temps pour le scavoir entendre ! Et si nostre belle maistresse s'establissoit encores un juge pour declarer l'intention qu'elle a eue, je vous monstrerois bien-tost que tout ce que vous venez de dire est plus à mon advantage qu'au vostre. Et s'il luy plaist de nous ouyr à ceste heure mesme, vous verrez que c'est à moy à la remercier de la victoire qu'equitablement elle m'a adjugée. - Silvandre, dit alors Diane, il n'est pas raisonnable que l'autheur mesme s'explique, et puis il me semble d'avoir parlé si clairement que quoy que j'y peusse adjouster n'y serviroit de rien. Mais je vous supplieray bien, puis que vous n'avez plus de gageure contre Phillis, et que je ne dois plus estre vostre juge, ny vostre maistresse, que vous vous souveniez que je m'appelle Diane.
Et ces dernieres paroles furent proferées avec un visage si serieux que Silvandre cogneut bien qu'elle le vouloit ainsi ; et toutesfois, feignant de le prendre d'autre façon, il respondit : Je sçay bien que vous estes ceste
